Hadirin sidang Jumat Rahimakumullah!
Rosulullah SAW ngadawuh dina salah sawios haditsna, anu diriwayatkeun ku Imam Muslim katut Imam Tirmidzi;
Hartosna: “Anjeun teu ngabogaan harta kecuali anu geus di dahar ku anjeun, atawa pakean iwalti anu geus dipake ku anjeun dugi kaburukna, atawa anu disodakohkeun nepika geus kaliwat”.
Hadirin sidang Jumat Rahimakumullah!
Ternyata harta anu sajatina harta, nyaeta harta benda anu geus dituang nu geus dinikmati ku urang, mun pakean geus buruk atawa hancur, lain anu aya keneh di imah atawa di gudang, di kamar atawa dina lomari, sabab harta anu masih keneh nyesa, eta harta bakal jadi parebutan jeung papaseaan ahli waris, pon nyakitu deui harta sodakoh eta mangrupakeun sajatina harta, anu moal leungit dugika kiamah sok sanajan jumlahna leutik atawa saeutik.
Lain duit anu aya dina dompet dina tabungan atawa di bank, sabab duit anu aya dinu kasebat bieu mungkin bakal ilang kulantaran aya nu nyokot, kaduruk atawa aya nunipu, ku hal eta pisan sateuacan harta benda urang dijadikeun parebutan ku ahli waris, dijadikeun persengketaan jeung fitnah.
Maka manfa’atkeun eta harta sahade-hadena kanggo bekel ibadah ka Allah kanggo taqorrub jeung to’at ka Allah, karna harta nu bisa mere kamanfa’atan nyaeta harta nu disodakohkeun jeung diinfakkeun dijalan Allah. Pidawuhna
Allah SWT:
مَا عِنْدَكُمْ يَنْفَدُ وَمَا عِنْدَ اللّٰهِ بَاقٍۗ وَلَنَجْزِيَنَّ الَّذِيْنَ صَبَرُوْٓا اَجْرَهُمْ بِاَحْسَنِ مَا كَانُوْا يَعْمَلُوْنَ
Hartosna: “Naon-naon anu aya diaranjeun eta bakal ilang, jeung naon anu aya di Allah eta bakal abadi”. (QS An-Nahl: 96)
Hadirin sidang Jumat Rahimakumullah!
Mudah-mudahan harta kadudukan jeung jabatan anu disandang ku urang ngajantenkeun wasilah kana lungsurna taufik jeung hidayah sahingga tiasa bersyukur kana kanikmatan ti Allah SWT.